Jónsmessuferð Gönguklúbbs Icelandair Group
Hraun – Fossar – Flúðir - Fjöll
|
Brottför
|
Föstudaginn 21. júní kl. 17:00 með rútu frá höfuðstöðvunum
|
Fararstjóri
|
Gestur Kristjánsson og Einar Bárðarson verður honum til aðstoðar
|
Tengiliðir
|
Jóhann Úlfarsson, Sveinbjörn Egilsson og Svava Björk Benediktsdóttir
Áhugaverð og þægileg tveggja nátta ferð um fáfarnar söguslóðir með gistingu á Hörgslandi ásamt veislukvöldverði að hætti IGS manna.
Verð kr. 12.500 á mann fyrir þá sem gista í uppábúnu rúmi í tvær nætur. Auk þess er rútan, gangan, leiðsögn og kvöldverður/grillveisla á laugardagskvöldinu innifalið. Einnig er boðið upp á tjaldstæði og er verð á mann þá kr. 4.500.
Vinsamlegast athugið að þátttökufjöldi er takmarkaður og er miðað við að gönguklúbbsfélagi geti tekið með sér maka/vin.
|
Dagur 1 - Sveitin heillar
Ekið verður sem leið liggur austur á Síðu í Vestur Skaftafellsýslu að Hörgslandi. Ferðin austur mun taka um fjóra tíma og er reiknað með einu stoppi í sjoppunni á Hvolsvelli. Á Hörgslandi munum við gista í tvær nætur, hvort sem er í uppábúnum rúmum í húsunum sem þar eru í boði eða hreiðra um okkur í tjaldi. Þeir sem velja tjaldgistingu hafa aðgang að eldunar- og snyrtiaðstöðu. Hægt verður að kaupa morgunverð á staðnum.
Í hverju húsi er svefnaðstaða fyrir 6 manns.
Dagur 2 - Hraun og fáfarnar slóðir
Lagt verður af stað frá Hörgslandi kl. 08:30 að morgni laugardags áleiðis að bænum Dalshöfða sem er um 20 mínútna akstur. Þar mun gangan okkar hefjast í Eldhrauninu upp með Hverfisfljótinu. Stefnan verður tekin á fjallið Hnútu sem er 539 metra hátt. Á leið okkar munum við sjá stórkostlega fossa og flúðir, þröng gljúfur og gil. Þegar Hálendisbrúninni verður náð við Hnútu munum við sjá hvar áin steypist niður í tveimur fossum með miklum hávaða. Þar verður gert hádegisstopp. Eftir góða pásu verður ferðinni haldið áfram yfir hraunið eftir vegaslóða sem nefnist Ráðherrabraut í áttina að bænum Þverá, þar sem rútan mun sækja okkur.
Gangan er um það bil 19 kílómetra löng í þægilegu göngulandi. Áætlaður göngutími er um það bil 7 - 8 tímar og hækkun um 300 - 350 metrar.
Um kvöldið munu IGS menn bera fram kvöldverð og síðan verður söngur, grín og gaman.
Dagur 3 - Home, sweet home
Brottför verður á sunnudagsmorgni. Það fer svolítið eftir veðri hvenær lagt verður í hann, en hugmyndin er að gera stutt stopp á leiðinni, annars vegar í sjoppunni á Hvolsvelli og síðan ætlar fararstjórinn að sýna okkur perlu á leiðinni. Eitthvað óvænt sem hann á ekki von á að margir hafi skoðað, perla sem er alveg við þjóðveginn. Forvitnilegt það.
Áætluð koma til Reykjavíkur er á milli kl. 15:00 og 16:00.
Stjórn Gönguklúbbs Icelandair Group.
